Uncategorized

بسطيلة الحوت او السمك بمقادير مضبوطة

بالنسبة للطريقة، كتاخدو نفس الكمية من الكروفيت، الكلامار و الحوت الابيض و الشومبينون، كل واحد واش بغى المهم نفس الكمية من كل حاجة!!!!اكيد خاص الحوت يكون مغسول كله و ناشف، كنوجدو الشرمولة ديالنا في اناء ولا جبانية ولا اللي بغيتو، المهم ديرو الربيع و معدنوس، فصاص الثوم (كثرو على حساب الحوت اللي عندكم) باودر ديال الثوم، باودر ديال القزبر يابس، السكينجبييير، الابزار، شوية الكمون، ورقة سيدنا موسى انا درت شي 3 طلقو ليا في الشرمولة، حامضة مرقدة ،درت غير القلب ديالها، صوص الصوجا، الهريسة خاص ضروري تجي حارة ولكن ماشي كتنحر تاني،التحميرة و راس المعلقة ديال الخرقوم بلدي و الملح حسب الدوق حيت ديجا كاينة الصوجا فهمتو، و كنعصر على هدشي عصير الحامض غير متكثروس و خلطو خلطو قد ما  وخليو داك الخليط يطلق ليكم ريحتو بوحدها فنة
دابة خودو مقلة و بداو على بركة الله، ديرو الزيت البلدية و قطعو بصلة كعيبات ، و رميو عليها الكروفيت و ديرو من ديك الشرمولة اللي خلطتو و خليوه على عافية مهيلة يتقلى مع ديك البصلة و ليقامة اهم شيء العافية مهيلة ملي تكملو و يبانليكم كلشي دخل في بعضياتو و طاب، دوزو تاني للكلمار بنفس الطريقة الزيت البلدية و ضيفو من الشرمولة اللي صاوبتو قبل، و الحوت نفس الشئ و ديما خدمو بالزيت البلدية كتبنن غير تكايسو على الحوت مايتهرسش ليكم، و صافي الشومبينيو بنفس الطريقة، ماشي ديال الحك البنات، داك الطري الاسود اللي كيكون بنين بزاف…..المهم فاش تساليو كونو مغلين قشور الكروفيت في الما و صفي داك الما من القشور هو اللي غادي تسلقو فيه الفيرميسيل ديالكم غير ماتكتروهش خاص البسطيلة تكون عامرة حوت ماشي شعرية !!، و قبل ما تخلطو العناصر مع بعضها نقصو شوية شوية من الحاجة باش فاش كنعمرو بسطيلة و قبل من سدوها كنحطو داكشي اللي نقصنا ، المهم فاش تخلطو كلشي دوقو الملح و الحرور واش هو هذاك باش الا كان ناقص زيدو شوية، و بالنسبة للورقة انا خدمت بهذه و بقيت كندهن ورقة بورقة بالزبدة باش تسهال عليا و باش تمشي معاية ومتقطعش و ماتكرمش، اما نتوما في المغرب الورقة عندكم موجودة و فنة و اللي بغات تدير حتى الفيلو كيبقى اختيار ديالكم، و بالنسبة للكروفيت ديال الزواق دوزتو في الزيت البلدية و الملح و الابزار و الثوم و خبيتو الى الاخير، و البصحة و الراحة

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى